سيجارة

سيجارة و كوباية شاي
و بكلم نفسي و اقول ازاى
في ناس تتمزج من القهوه
و ناس تتمزج من الناي
....
و دى تاني سيجارة بولعها
و بفكر فيها و في جمالها
بحبها دايماً و بغنيلها
و انا عمرى ما خطرت في بالها
....
سيجارة و وراها سيجارة
بولع و فاكرها شطارة
بس اعمل ايه اصلها عادة
و بقت حكمانى بجدارة
....
قمت اجيب علبة سجاير
لقيتها واقفه و يا ساتر
جامدة اوى بنت الايه
اكلمها ولا مانيش قادر
...
رجعت تانى ع القهوة
ندانى واحد من جوه
قاعد لوحدك ليه يا ريس
و قام ضاربنى على سهوه
....
تفتكروا اسيبه كدا و امشي
و افضل متأثر و مانامشي
رزعته رجل كدا في صدره
وقع على الأرض ماقامشي
....
كدا الليلة قلبت ضلمة
و القهوة فجأة بقت زحمه
ناديت على احمد و حاسبته
وانا ماشي دست على فحمه
....
دا ايه الليله الزفت ديا
بقي كل دا بسببها هيا
يا ريتنى ما قمت أجيب سجاير
و لا قابلتك يا جنية !!